Home Latest അവൾ എന്റേതാണ്, അവളുടെ സൗന്ദര്യം തുളുമ്പുന്ന മേനി അത് എനിക്ക് മാത്രം അവകാശപ്പെട്ടതാണ്…

അവൾ എന്റേതാണ്, അവളുടെ സൗന്ദര്യം തുളുമ്പുന്ന മേനി അത് എനിക്ക് മാത്രം അവകാശപ്പെട്ടതാണ്…

0

എത്ര പെട്ടന്നാണ് അവൾ വലുതായത്.
ചുവന്നു തുടുത്ത ഇതളുകൾ പോലുള്ള അവളുടെ മുഖം..അവളുടെ മേനി അഴക് ആരെയും വശീകരിക്കുന്ന തരത്തിൽ ഉള്ളതായിരുന്നു..മെലിഞ്ഞ ശരീരം അവളെ കൂടുതൽ സുന്ദരിയായി തോന്നിച്ചു….
പ്രകൃതി എന്തിന് ഇവൾക്ക് ഇത്രയും സൗന്ദര്യം നൽകി…

അവളെ സ്വന്തമാക്കാനുള്ള ഒരു ആവേശം അവന്റെ കണ്ണുകളിൽ പ്രതിധ്വനിക്കുന്നുണ്ടായിരുന്നു. അവളുടെ വശ്യമായ ചിരിയിൽ അവൻ അലിഞ്ഞില്ലാതായി. അവളുടെ സൗന്ദര്യം ആരെയും അവളിലേക്ക് അടുപ്പിക്കുന്നതായിരുന്നു.

അവൾ എന്റേതാണ്, അവളുടെ സൗന്ദര്യം തുളുമ്പുന്ന മേനി അത് എനിക്ക് മാത്രം അവകാശപ്പെട്ടതാണ്. അത് ഞാൻ സ്വന്തമാക്കിയിരിക്കും.

**********************************************

രാത്രി സമയം 8നോട് അടുത്തിരുന്നു……

ഇന്നു അവൾ ഒറ്റയ്ക്കാണ്.. വിട്ടിൽ ഉള്ള മറ്റുള്ളവർ പുറത്തു പോയിരിക്കുന്നു. ഇതാണ് നല്ല അവസരം. ഇന്നവളെ ഞാൻ സ്വന്തമാക്കിയിരിക്കും…

അവൻ അവളുടെ വീട് ലക്ഷ്യമാക്കി നടന്നു….

കാതടിപ്പിക്കുന്ന ചീവിടിന്റെ ശബ്‌ദം അവന് അരോചകമായി തോന്നി…. അവളുടെ വീടിന്റെ അടുത്തായി വീടുകൾ ഒന്നും തന്നെ ഇല്ല തികച്ചും ഒറ്റപെട്ടു കിടക്കുന്ന വീട്..

ചെറിയ സ്ട്രീറ്റ് ലൈറ്റിന്റെ വെളിച്ചത്തിൽ അവൻ അവിടെ എത്തി.ആ വീട്ടിൽ ഒരു പട്ടി ഉണ്ട് അതിനെ കൂട്ടിൽ അടച്ചു ഇട്ടിരുന്നത് അവനു ഉപകാരം ആയി. അതിന്റെ കണ്ണിൽ പെടാതെ അവൻ അകത്തു കടന്നു….

ഇ സമയം അവൾ ജനലിന്റെ വാതിക്കൽ നിന്നുകൊണ്ട് മരത്തിൽ വസിക്കുന്ന രണ്ടു ഇണക്കുരുവികളുടെ കൊഞ്ചൽ ആസ്വദിച്ചുകൊണ്ടിരിക്കുകയായിരുന്നു. പെട്ടന്നാണ് അവളുടെ പുറകിൽ ആരോ നിൽക്കുന്നതായി അവൾക് തോന്നി.

ആ നിഴൽ അവളിലേക് അടുത്തുകൊണ്ടിരുന്നു. ഇളംകാറ്റിൽ മരവിച്ച പോലെ അവളുടെ ശരീരം ആലില പോലെ വിറച്ചു. അവൾ പതിയെ തിരിഞ്ഞു നോക്കി. പെട്ടന്നു കറന്റ് പോയി. ഇരുട്ടിൽ അവന്റെ കണ്ണുകൾ തിളങ്ങി.

അവൻ പോലും പ്രതിഷിക്കാതെ കറന്റ് പോയത് അവനിലും ഭയമുളവാക്കിയെങ്കിലും
അവളെ സ്വന്തമാക്കാനുള്ള ആവേശത്തിൽ അവൻ അത് കാര്യമാക്കിയില്ല.

അവനെ കണ്ടതും അവൾ ഒന്നു പിന്നോട്ട് വലിഞ്ഞു. അവന്റെ കണ്ണുകൾ അവളിൽ ഭീതി ജനിപ്പിച്ചു. അവൾ ഒന്നു കൂവി വിളിക്കാൻ ഒരു വിഫലശ്രമം നടത്തി,പക്ഷേ… അത് അവളുടെ കാണ്ഠത്തിൽ നിന്നും പുറത്തു വന്നില്ല.അവൻ അവളിലേക് അടുക്കുംതോറും അവളുടെ ഹൃദയമിടിപ്പ് ക്രമാതീതമായി വർധിച്ചു കൊണ്ടിരുന്നു.

അവളെ തന്നിലേക്കടുപ്പിക്കാൻ അവന്റെ കൈകൾ നീണ്ടു ആ കൈകൾ വിറയ്ക്കുന്നുണ്ടായിരുന്നു. കണ്ണുകൾ കുറുകി.
അവന്റെ ഇടതു കൈ അവളുടെ ഉദരത്തിൽ കയറി പിടിച്ചു.വലതു കൈ അവളുടെ മേനിയിൽ ഒഴുകി നടന്ന് ആസ്വദിച്ചു.അവനോടുള്ള അറപ്പുമൂലം അവൾ കണ്ണുകൾ ഇറുകി അടച്ചു.കുതറി കൊണ്ട് അവൾ തന്നാലാവും വിധം എതിർപ് പ്രകടിപ്പിച്ചു. അവളുടെ എതിർപ് അവനെ കൂടുതൽ ആവേശഭരിതനാക്കി.

അവളുടെ നിലവിളി അവിടെ പ്രതിധ്വനിച്ചു.പക്ഷേ അതൊന്നും അവന്റെ കാതുകളിൽ പതിച്ചില്ല.അവളെ സ്വന്തമാകാനുള്ള ആവേശത്തിൽ എവിടേയോ കൊണ്ട്‌ അവന്റെ കൈ മുറിഞ്ഞു രക്തം തൂവി. കൈ പിൻവലിച്ചു അവൻ കൈ കുടഞ്ഞു അതിൽ ചില തുള്ളികൾ അവളുടെ കവിൾ തടത്തിൽ പതിച്ചു.

അവൻ അരയിൽ സൂക്ഷിച്ചിരുന്ന ഒരു പേനാക്കത്തി എടുത്ത് അവളുടെ അടിവയറ്റിൽ ചേർത്ത് അമർത്തി വരഞ്ഞു. അവൾ ഒന്നു പിടച്ചു കണ്ണുകൾ പുറത്തേക്ക് തളളി. കണ്ണിൽ നിന്നും ഒലിച്ചിറങ്ങിയ കണ്ണുനീർ അവളുടെ കവിൾ തടത്തിൽ ഉണ്ടായിരുന്ന അവന്റെ രക്തത്തുള്ളിയിൽ ചേർന്ന് ഒഴുകി.കണ്ണിൽ നിന്നു ചോര വരുന്ന പോലെ തോന്നിച്ചു അത്.

അതെ ഒരു ആറാം ക്ലാസുകാരന്റെ ക്രൂര കൃത്യത്തിൽ ആ പനിനീർ പുഷ്‌പം ഇരയായി തീർന്നിരിക്കുന്നു….

**********************************************

ആ പനിനീർ പുഷ്‌പം അവൻ ആരും കാണാതെ അവന്റെ സ്കൂൾ ബാഗിൽ ഒളിപ്പിച്ചു.നാളെ അവന്റെ കളിത്തോഴിക്ക് സമ്മാനിക്കാൻ…

അവൻ ആ മനോഹര നിമിഷത്തെ കുറിച്ചോർത്തുകൊണ്ട് നിദ്രയിൽ മുഴുകി……

രചന :  അഖിൽ ഗോപിനാഥ് )

LEAVE A REPLY

Please enter your comment!
Please enter your name here