Home Article പിരിയാൻ തീരുമാനിക്കുന്ന എല്ലാവരുടെയും വീട്ടിലെ കറന്റ്‌ രണ്ട് ദിവസത്തേക്ക് കളഞ്ഞാൽ മതി..!!

പിരിയാൻ തീരുമാനിക്കുന്ന എല്ലാവരുടെയും വീട്ടിലെ കറന്റ്‌ രണ്ട് ദിവസത്തേക്ക് കളഞ്ഞാൽ മതി..!!

0

2 ദിവസമായി ഇവിടെ കറന്റ്‌ പോയിട്ട്. കെ എസ് ഇ ബി യിൽ വിളിച്ചിട്ടാണെങ്കിൽ കിട്ടുന്നുമില്ല. റിസീവർ മാറ്റി വെച്ചേക്കുവാണെന്ന് തോന്നുന്നു. ബിസി ട്യൂൺ ആണ് കേൾക്കുന്നത്. കറന്റ്‌ പോയാൽ പിന്നെ അവർക്ക് ആരും സമാധാനം കൊടുക്കാറില്ലല്ലോ! അതുകൊണ്ട് അവർ ഇങ്ങനെ ചെയ്യുന്നതിലും തെറ്റില്ല. പക്ഷേ അവർ അറിയാത്ത എവിടെയെങ്കിലും ലൈൻ പൊട്ടി കിടക്കുവാണെങ്കിലോ? അതറിയാതെ അവർ മെയിൻ സ്വിച്ച് ഓൺ ആക്കിയാൽ എന്തായിരിക്കും സംഭവിക്കുക? ഞാൻ എന്തിനാ ഇങ്ങനെ ഓരോന്ന് ചിന്തിച്ചു കൂട്ടുന്നതെന്ന് ചോദിച്ചാൽ…… വേറെ ഒന്നും ചെയ്യാനില്ലാഞ്ഞിട്ടാ…!!

2 ദിവസമായി തുടർച്ചയായ മഴയാണ്. ഫോൺ ചാർജ് ചെയ്തു ചെയ്തു പവർ ബാങ്കും ചത്തു. ഭാഗ്യം കൂടിയ സമയമായതുകൊണ്ട് ഇൻവെർട്ടർ നേരത്തെ തന്നെ വീര്യമൃത്യു വരിച്ചു. ഒരു നല്ല ഞായറാഴ്ചയായിട്ട് അതും കുളമാകുമെന്ന് ആലോചിക്കുമ്പോഴാ…. ഹാ…. പറഞ്ഞിട്ട് ഒരു കാര്യവുമില്ല. ഇന്നാണ് ഈ വീട്ടിലെ എന്റെ ലാസ്റ്റ് സപ്പർ. പേടിക്കേണ്ട കേട്ടോ! ഞാൻ മരിക്കാൻ ഒന്നും പോകുവല്ല.

ഇവിടെ ഇന്ത്യ പാകിസ്ഥാൻ യുദ്ധം തുടങ്ങിയിട്ട് 2 വർഷമായി. വേറെ ആരുമല്ല എന്റെ സ്വന്തം പപ്പയും മമ്മയുമാണ്. സ്കൂൾ ടീച്ചറായ മമ്മയ്ക്കും കോളേജ് പ്രൊഫസറായ പപ്പയ്ക്കും ഒരുമിച്ചു ജീവിക്കാൻ താൽപര്യമില്ല പോലും. അവർക്ക് ഇഷ്ടമല്ലെങ്കിൽ ഞാൻ എന്ത് ചെയ്യാനാ? 18 വയസ്സായതുകൊണ്ട് ഒരു വിധത്തിൽ രക്ഷപെട്ടു. നാളെയാണ് ഈ യുദ്ധത്തിന്റെ കലാശകൊട്ട്.
സന്ധ്യ സമയമായതുകൊണ്ട് പപ്പ കടയിൽ നിന്ന് മെഴുകുതിരി മേടിച്ചുകൊണ്ട് വന്ന് കത്തിച്ചിട്ടുണ്ട്.

മമ്മ നേരത്തെ തന്നെ പണിയെല്ലാം ഒതുക്കി വച്ചിട്ടുണ്ട്. എല്ലാരുടെയും ഫോണിന് ഇന്ന് രാവിലെ തന്നെ അന്ത്യകൂദാശ കൊടുത്തിരുന്നു. മെഴുകുതിരി വെട്ടത്തിൽ കാണാം രണ്ടുപേരും അവിടെ കസേരയിൽ ഇരിക്കുന്നത്. എനിക്കറിയാം കൊന്നാലും രണ്ടുപേരും പരസ്പരം സംസാരിക്കില്ലെന്ന്. സംസാരിക്കണമെങ്കിൽ ഈ വീട് ഒരു കുടുംബകോടതി ആവണം.

ന്യൂസ്‌ പേപ്പർ അവിടെ അനാഥമായി കിടപ്പുണ്ട്. ഞാൻ സിറ്റ്ഔട്ടിൽ ഇരുന്നു മഴ കാണുവാ. ഇവിടെ ഇരുന്നാൽ തിണ്ണയിൽ ഉള്ള അവരെ രണ്ടുപേരെയും കാണാം. പണ്ടാണെങ്കിൽ പപ്പ ടി വി യുടെ മുന്നിൽ ഇരിക്കുന്ന സമയമാണ് ഇത്. ന്യൂസ്‌ ചാനൽ മാറ്റാറേയില്ല. ഞങ്ങൾ എന്തെങ്കിലും പറഞ്ഞാലും കേൾക്കില്ല. 10 മണിക്ക് കിടക്കുകയും ചെയ്യും. മമ്മയാനെങ്കിൽ 11 കഴിയും. ഫോണും നെറ്റും വന്നതിനു ശേഷം, മമ്മാ എന്ന് വിളിച്ചാൽ പോലും കിട്ടാറേയില്ല. കിട്ടണമെങ്കിൽ വാട്സ്ആപ്പ് ചെയ്യേണ്ട അവസ്ഥ. കാലം പോയ പോക്കേ!

ന്യൂ ജനറേഷൻ ആണെകിലും ഞാൻ നല്ല കുട്ടിയായിരിക്കാൻ കാരണം ഒരാഴ്ച മുൻപ് വരെ ഇവിടെ ഉണ്ടായിരുന്ന ഒരാളാണ്. വേറെ ആരുമല്ല, എന്റെ വല്ല്യപ്പച്ചനാ. ഇപ്പോ ഒരു ധ്യാനം കൂടാൻ പോയേക്കുവാ. നാളെ തിരിച്ചു വരും. മൂപ്പരാണ് എന്റെ കൂട്ട്. ഞാൻ ഇല്ലാത്തപ്പോൾ പുള്ളിക്കാരൻ ബൈബിളിൽ മുഴുകും. പപ്പയ്ക്കും മമ്മയ്ക്കും എന്റെ കാര്യം നോക്കാൻ ഒന്നും സമയമില്ലല്ലോ!

“നിങ്ങൾക്ക് കണ്ണ് കണ്ടൂടെ അച്ചായാ?”
മമ്മയുടെ ശബ്ദം കേട്ട് ഞാൻ അങ്ങോട്ടു നോക്കി. മമ്മ പപ്പയോട് സംസാരിക്കുവാണോ? അതിശയം തന്നെ! എന്തോ താഴെ പോയപ്പോൾ എടുക്കാൻ പപ്പ കുനിഞ്ഞിട്ട് നിവർന്നതാ. മമ്മ കണ്ടില്ലായിരുന്നെങ്കിൽ പപ്പയുടെ മുടിയിൽ തീ പിടിച്ചേനെ! പക്ഷേ മമ്മ ഇതുവരെ കൈ പപ്പയുടെ തലയിൽ നിന്നും എടുക്കുന്നില്ലല്ലോ! ഇനി തല പിടിച്ചു നിലത്ത് അടിക്കാനോ മറ്റുമാണോ? ക്യാൻഡിൽ ലൈറ്റ് ഡിന്നർ പോലെ രണ്ടുപേരും കണ്ണും കണ്ണും നോക്കി ഇരിക്കുവാ. ഞാൻ പിന്നെ അങ്ങോട്ടു നോക്കിയില്ല. വെറുതെ എന്തിനാ നമ്മളായിട്ട്…… ഞാൻ പതിയെ മുറിയിലോട്ട് പോന്നു.

ഒരു ചെറിയ മയക്കത്തിന് ശേഷം ഞാൻ തിണ്ണയിലോട്ട് ചെന്നു. ഭയങ്കര നിശബ്ദത. ആ കാഴ്ച കണ്ട് ഞാൻ ഞെട്ടി പോയി. എന്താണെന്ന് അറിയില്ല, കണ്ണിൽ നിന്ന് വെറുതെ വെള്ളം വന്നു. കണ്ണുകളെ വിശ്വസിക്കാൻ പറ്റിയില്ല. കൈയ്യിൽ പതിയെ നുളളി നോക്കി. നന്നായി വേദനിച്ചു.
പപ്പയും മമ്മയും അടുത്തിരുന്നു ആൽബം കാണുന്നു. ഞാൻ മമ്മയുടെ വയറ്റിൽ കിടക്കുന്ന സമയം മുതൽ ഉള്ള ഫോട്ടോസ് ഉണ്ടതിൽ. അവർ പരസ്പരം എന്തൊക്കെയോ പറഞ്ഞു ചിരിക്കുന്നു.
“എന്താ ഇവിടെ രണ്ടുപേരും പരിപാടി?”

“ഞങ്ങൾ ചുമ്മാ ഓരോന്നും മിണ്ടീം പറഞ്ഞും ഇരുന്നതാ ! എന്നാടാ?”
“ആ… പറഞ്ഞോ ! നാളെ രണ്ടും തല്ലി പിരിയാൻ പോകുവല്ലേ ! ഇന്ന് ആഘോഷിച്ചോ!” ഞാൻ നല്ലൊരു കുത്ത് കൊടുത്തു.

“ആര് പറഞ്ഞു ഞങ്ങൾ പിരിയുവാണെന്ന്? ഞാൻ എന്റെ ആനികൊച്ചിനെ പിരിയുന്നില്ല. ” പപ്പയുടെ വകയാണ് ആ കമന്റ്‌.

മമ്മ കള്ളചിരിയോടെ എന്നെ കണ്ണടച്ചു കാണിച്ചു. ഭൂലോകം മുഴുവൻ പിടിച്ചടക്കിയ സന്തോഷം ആയിരുന്നു എനിക്കപ്പോൾ. എത്ര കാലമായി അവരെ ഇങ്ങനൊന്ന് കണ്ടിട്ട്. എന്റെ പ്രാർത്ഥന ദൈവം കേട്ടു.

പിരിയാൻ തീരുമാനിക്കുന്ന എല്ലാവരുടെയും വീട്ടിലെ കറന്റ്‌ രണ്ട് ദിവസത്തേക്ക് കളഞ്ഞാൽ മതി, ഒരു കുടുംബകോടതിയുടേയും ആവശ്യം വരില്ലെന്ന് എനിക്കപ്പോൾ മനസിലായി.

LEAVE A REPLY

Please enter your comment!
Please enter your name here